រយៈពេលជាងមួយខែហើយដែលខ្ញុំបានដើរចោលផ្ទះ ! មើលចុះ ធូលីច្រើនដល់ហើយ ! គ្រឿងសង្ហារិមទាំងឡាយបាត់បង់អស់ភាពប្រណិត ហើយពីងពាងក៏តាំងខ្លួនជាម្ចាស់ផ្ទះទៀត ! ហ៊ឺ ! បើដូចនេះ ផ្ទះមួយខ្នងនេះនៅតែជាកម្មសិទ្ធិរបស់ខ្ញុំទៀតទេហ្ន៎ ? អុញ ! ដានជើងអ្នកណាខ្លះហ្នឹង ? បើតាមសង្កេតលើដានជើងនីមួយៗ គឺបង្ហាញឲ្យឃើញថា មានមនុស្សប្រមាណជា 4 ទៅ 5 នាក់ ដែលបានចូលមកក្នុងផ្ទះ ។ តើពួកគេជាអ្នកណាខ្លះហ្នឹង ? ពេលខ្ញុំមិននៅផ្ទះ តើមានរឿងអ្វីកើតឡើង ? តើចូលមកនេះក្នុងបំណងអ្វីឲ្យពិតប្រាកដ ? តែបើមើលឲ្យបានដិតដល់លើដានជើងទាំងនោះ គឺគ្មានអ្វីចម្លែកនោះទេ គឺដើរតាមដំណើរថ្មើរជើងធម្មតា មិនប្រញាប់ប្រញាល់ មិនលិបល អូ ! ដានជើងបងៗនិងមិត្តភ័ក្ដិ របស់ខ្ញុំទេតើ ! ខំតែភ័យ !
អវត្ដមានពីផ្ទះនេះ គឺមូលហេតុទាក់ទងនឹងការប្រលង ដូចនេះពិតជាគ្មានពេលវេលាចំណាយជាមួយនឹង WordPress ទៀតទេ ជាពិសេសគឺការ Update ប្លក់នេះតែម្ដង ! សង្ឃឹមថាអ្នកទាំងអស់គ្នាមិនប្រកាន់ខឹងចំពោះការបាត់មុខពីពិភពប្លក់របស់ខ្ញុំនោះទេ ហើយក៏សង្ឃឹមដែរថា បងៗនឹងនៅតែចាំមុខប្អូនស្រីម្នាក់នេះ ដូចដែលប្អូននៅតែចាំបងៗដូចគ្នា !
ថ្មីៗនេះមានរឿងអ្វីកើតឡើងក្នុងសហគមន៍ប្លក់របស់យើងខ្លះទៅ ? ដឹងត្រឹមតែមានសមាជិក WordPress ខ្លះបានប្ដូរអាសយដ្ឋាន ហើយក្រៅពីនោះ គឺងងឹតស្លុបដូចដាច់ចរន្តអគ្គិសនីនាពេលរាត្រីអ៊ីចឹង ! សូមមេត្តារ៉ាយរ៉ាប់ប្រាប់ខ្ញុំផង !
និយាយពីផ្ទះមួយនេះវិញ ខ្ញុំមិនដែលមានគំនិតចង់បោះបង់វានោះទេ ព្រោះវាជារបស់តែម្យ៉ាងគត់ដែលនាំឲ្យខ្ញុំបានស្គាល់បងៗនិងមិត្តៗទាំងអស់គ្នា ។ រយៈកាលកន្លងមកនេះ សូមអរគុណរាល់សន្ដានចិត្តស្រលាញ់រាប់អានខ្ញុំដូចបងប្អូនសាច់ឆ្ងាយម្ដាយទីទៃអ៊ីចឹងដែរ ! និយាយលេងទេ តែជាការពិត !
ឆ្លៀតឱកាសនេះដែរ ( ព្រោះពុំមានឱកាសឲ្យឆ្លៀតទៀត ) សូមជូនពរអ្នករាល់គ្នាឲ្យជួបប្រទះតែសេចក្ដីសុខ ចម្រុងចម្រើន ជាពិសេសនាឱកាសបុណ្យចូលឆ្នាំចិននេះតែម្ដង !
祝你们 新年快乐 ！恭喜发财 ！红包大大来 ！心想事成 ！和 万事如意 !
ម្ចាស់ប្លក់ ៖ សុវណ្ណរចនា
អត្ថបទ ពី ខែ មករា 2008
ផ្ទះខ្ញុំធូលីច្រើនដល់ហើយ !
ខែ មករា 30, 2008 · 30 វិចារ
ចំណាត់ក្រុម ៖ Uncategorized
Rain និង Tata Young
ខែ មករា 6, 2008 · 13 វិចារ
Rain និង Tata Young ជាប់ឈ្មោះជាតារាល្បីមួយគូនៅអាស៊ី ៖
តារាចម្រៀងដ៏ល្បីរបស់កូរ៉េនិងថៃគឺ Rain ( Jung Ji Hoon ) និងTata Young បានប្រកាសថាខ្លួននឹងជួយធ្វើការផ្សព្វផ្សាយ និង អំពាវនាវក្នុងកម្មវិធីនានាក្នុងទូរទស្សន៍ MTV ដើម្បីរួមចំណែកប្រយុទ្ធប្រឆាំងនឹងការរកស៊ីជួញដូរមនុស្ស ។ តារាទាំងពីរដួងនេះបាននិយាយបា្រប់សារព័ត៌មានមួយរបស់ហុងកុងថាពួកគេមានការស្អប់ខ្ពើមនិងមានការឈឺចាប់ជាខ្លាំងដែលមនុស្សធ្វើការជួញដូរលើកម្លាំងញើសឈាមរបស់មនុស្សដូចគ្នាយ៉ាងនេះ ។ ពួកគេនឹងធ្វើការផ្សព្វផ្សាយក្នុងកម្មវិធីឯកសារនិងកម្មវិធីផ្សេងៗទៀតដែលពួកគេទទួលខុសត្រូវក្នុងទូរទស្សន៍ MTV ដើម្បីជាការក្រើនរំលឹកដល់មនុស្សទាំងឡាយឲ្យចេះប្រុងប្រយ័ត្នខ្លួន ចៀសវាងការចាញ់បោកពួកឈ្មួញទុច្ចរិតដែលតែងតែប្រើវិធីស្មោកគ្រោករាប់មិនអស់ដើម្បីទាញយកផលប្រយោជន៍ពីមនុស្សដូចគ្នា ។ លើសពីនេះពួកគេចង់ឲ្យជនដែលធ្លាប់ប្រព្រឹត្តិខុសឆ្គងទាំងអំបាលម៉ាននេះងាកមកដើរផ្លូវល្អប្រពៃវិញ ។ ពួកគេបានឲ្យនិយមន័យនៃការជួញដូរមនុស្សនេះថាជាការបង្កើតឲ្យមានវណ្ណៈទាសភាពសម័យទំនើប ។
អង្គការពលកម្មអន្តរជាតិបានឲ្យដឹងថាករណីជួញដូរមនុស្សដូចជាស្ត្រី និងកុមារដើម្បីបម្រើសេវាកម្មផ្លូវភេទនិងធ្វើការជាទម្ងន់ច្រើនតែត្រូវបានគេនាំចូលទៅប្រទេសថៃ ។ ប្រទេសអូស្ត្រាលី ហុងកុង ចិន ជប៉ុន កូរ៉េ និងតៃវ៉ាន់ សុទ្ធតែជាប្រទេសដែលជាប់ចំណាត់ថ្នាក់ក្នុងការជួញដូរមនុស្សពីប្រទេសម៉ាឡេស៊ី និងហ្វីលីពីនផងដែរ ។ អង្គការសហប្រជាជាតិបានឲ្យដឹងថាការជួញដូរមនុស្សឲ្យធ្វើជាស្រីពេស្យា និងធ្វើការខុសច្បាប់ជាជំនួញដ៏កាក់កបដែលអាចរកប្រាក់ចំណូលបានពី ៧ ទៅ ១០ លានកោដ្ឋដុល្លារ ជារៀងរាល់ឆ្នាំ ទោះបីជាអង្គការអន្តរជាតិនានាខិតខំចាត់វិធានការណ៍ដើម្បីប្រយុទ្ធប្រឆាំងនឹងបញ្ហាអសកម្មនេះកម្រិតណាក៏ដោយក៏ស្ថានភាពនៅតែយ៉ាប់យ៉ឺនដដែលដរាបណានៅតែមានមនុស្សខ្វះការភ្ញាក់រលឹកនិងមិនមានការជួយគ្នាទៅវិញទៅមក ៕
ចំណាត់ក្រុម ៖ Uncategorized
បានដាក់ប្លាក ៖ អ្នកចំរៀង, rain and tata young
លាហើយ 2007 ! 2008 មកដល់ហើយហ៎ ?
ខែ មករា 1, 2008 · 9 វិចារ
៣៦៥ ថ្ងៃក្នុងឆ្នាំ ២០០៧ នេះមានរឿងរ៉ាវជាច្រើនកើតឡើងក្នុងជីវិតរបស់ខ្ញុំ មានទាំងរឿងល្អនិងរឿងអាក្រក់លាយឡំគ្នាជាមួយសំណើចនិងទឹកភ្នែក តែយ៉ាងណាក៏អរគុណអ្នកដែលបានផ្ដល់ឱកាសឲ្យខ្ញុំមានជីវិតរស់រានបន្ថែមបានមួយឆ្នាំទៀត ! បទពិសោធន៍ជាច្រើនដែលខ្ញុំបានទទួលក្នុងឆ្នាំ ២០០៧ នេះព្រមជាមួយកំហុសជាច្រើនផងនោះបានធ្វើឲ្យខ្ញុំយល់ច្បាស់ថាខ្លួនខ្ញុំនេះពុំមែនជាមនុស្សល្អណាស់ណាទេ គឺនៅតែមានកំហុស ហើយទង្វើជាច្រើនគឺនៅតែមិនពេញភ្នែកអ្នកទាំងអស់គ្នាទោះបីជាខ្ញុំគិតថាខ្លួនឯងបានព្យាយាមរួចទៅហើយ ។ ដូចនេះជាលទ្ធផលគឺខ្ញុំបង្វែរការគិត និងគំនិតអាត្មានិយមរបស់ខ្លួនឯងដែលពីមុនចូលចិត្តតែទាមទារឲ្យគេគ្រប់គ្នាបំពេញតាមចំណង់ចំណូលចិត្តរបស់ខ្លួននោះ ដោយឈប់មានអារម្មណ៍បែបនេះទៀតហើយ គឺគិតពីអារម្មណ៍របស់គេគ្រប់គ្នាដែរចំពោះការទាមទាររបស់ខ្លួន ម្យ៉ាងខ្លួនខ្ញុំនេះក៏មិនអាចបំពេញបានគ្រប់តាមអ្វីដែលគេគ្រប់គ្នាត្រូវការដែរ ។
និយាយអញ្ចឹង មានអ្នកណាបានរាប់ថយក្រោយដើម្បីទទួលស្វាគមន៍ឆ្នាំថ្មី ២០០៨ នេះទេ ? អារម្មណ៍ដែលបានរាប់លេខថយក្រោយនេះគឺពិតជារំភើបនិងអស្ចារ្យណាស់សម្រាប់រូបខ្ញុំ ព្រោះខ្ញុំបានរាប់ថយក្រោយជាមួយនិងមនុស្សពិសេសរបស់ខ្ញុំម្នាក់ដែលខ្ញុំស្រលាញ់និងគោរពអស់ពីបេះដូង នោះគឺអ្នកម៉ាក់របស់ខ្ញុំ !
ចំណាត់ក្រុម ៖ Uncategorized
